頭先突然諗起以前細個自己最鍾意中秋節。
讀緊小學嘅時候，
中秋節係唯一一個可以自己出夜街嘅節日
可以攞正牌同朋友落公園玩蠟燭玩到十點幾先番屋企
唔知有咩好玩，但每年中秋節就係要點下蠟燭
以前住青衣，每年中秋海傍都會坐滿哂人
就如周日菲傭姐姐一樣，各自同朋友圍圈坐
可以同自己嗰堆朋友玩之餘，亦可以去搵另一班朋友
交際花一樣，坐足一晚都唔會覺得悶。
以前每年中秋節都可以自己揀一個燈籠
揀燈籠同女人揀邊個包包帶番工一樣凝重。
記得以前買蠟燭都有quota，每年只可以買幾盒
每一枝都覺得非常珍貴，要點到佢最後就肯收手。
後來讀中學慢慢都無再咁鍾意中秋節
尤其高中兩年，覺得坐喺海傍點兩枝蠟燭異常戇鳩
於是情願去唱K，或者去朋友屋企坐下就算。
後來就再無去海傍過中秋，就如無再去尖東倒數一樣。
依家嘅我，實在無可能再同你坐一晚海傍
唔係講緊悶唔悶，係講緊坐地下咁耐條腰會好痛
亦無可能再去尖東同人逼住倒數，企太耐腳都會痛。
我老了。
中秋節對我嘅意義都失去了。
甚至有種感覺係人愈嚟愈大，就愈唔鍾意過節
依家細個覺得節日先可以做好多平時做唔到嘅野
可以同朋友玩、逗利是、出夜街、開party⋯
但依家覺得湊熱鬧好攰，過節要送禮好煩，
紅日條街好多人好逼，反而開始鍾意平日。
我諗我有日都會重新愛上中秋節
就係當我同身邊朋友都有小朋友之時，
我應該會再次喜歡每年坐海傍嘅日子。
P.S 啱啱諗起最後一個好開心嘅中秋
係六年前未同麥仔一齊，第一次同佢睇戲嘅中秋。
中秋節快樂。
希望12個家庭都可以快啲團圓 ;')
#Save12HKyouth
喜歡我的文字，請支持我的Patreon：
https://www.patreon.com/hkgirlfriend
**收入會將一半捐出支援被捕人士。
IG：@hkgirlfriend
FB：港女友
Search